သမ္မာကျမ်းစာလာ စနစ်တကျ စီမံခန့်ခွဲမှု
စီမံခန့်ခွဲမှုသည် နေရာတိုင်း၊ အဖွဲ့အစည်းတိုင်း၊ စီးပွားရေးလုပ်ငန်း ဖြစ်စေ၊ လူမှုရေးလုပ်ငန်းဖြစ်စေ၊လိုအပ် ပါသည်။ အရေးကြီးပါသည်။ ပါဝင်ပတ်သက်နေသော သူများအားလုံး မိမိတို့လိုလားသော ချမှတ်ထားသော ရည်မှန်းချက် ပေါက်မြောက်ရေးအတွက် တစ်ဦးကောင်း တစ်ယောက်ကောင်းဖြင့် မရ။ စီမံခန့်ခွဲမှု ကောင်းမှသာ အောင်မြင်မည် ဖြစ်ပါသည်။
စိမံခန့်ခွဲမှု ပညာရပ်နှင့် ပတ်သက်လာလျင် ပီတာ ဒရပ်ကာ၊ ဒေးလ် ကာနက်ဂျီ၊ ဟင်နရီ ဖို့ဒ် နှင့် အခြားပုဂ္ဂိုလ် များစွာတို့ သည် မိမိတို့၏ နယ်ပယ်အသီသီးတွင် စီမံခန့်ခွဲမှုကောင်းမွန်ခြင်းကြောင့် သူတို့၏ လုပ်ငန်းများ အောင်မြင်သကဲ့သို့ သူတို့၏ စီမံခန့်ခွဲမှု နည်းစနစ်များကို အများက လေ့လာပြီး လိုက်နာကျင့်သုံးခဲ့ကြပါသည်။
လူ့သမိုင်းအစ တစ်ဦးထည်းနေစဉ်ကပင် မိမိ၏အချိန် နှင့် လုပ်အားကို အခြေအနေနှင့် လိုက်လျောညီထွေစွာ ခွဲခြားဆောင်ရွက်နေခြင်းသည်ပင် စီမံခန့်ခွဲနေခြင်းဖြစ်ပါသည်။ နောင်ကာလ မိသားစု အသွင် စုပေါင်းနေထိုင်ခြင်း၊ အိမ်ထောင်စုအများ ကျေးရွာ မြို့ပြအသွင် စုပေါင်းနေထိုင်လာသော အခါတွင် လည်းကောင်း၊ မိမိ အစားအစာ အဝတ်အစားများကို မိမိဖာသာ ရှာကြံစားသောက်နေရာမှ ကုန်စည်ချင်း ဖလှယ်ခြင်း၊ ကုန်သွယ်ခြင်း၊ မိမိအားသန်သောအရာကို အမြောက်အများ ထုတ်လုပ်ခြင်းအားဖြင့် ကုန်ထုတ်လုပ်ငန်းများ ပေါ်ပေါက်လာသောအခါ စီမံခန့်ခွဲမှုသည် ပိုမိုအရေးပါလာပါသည်။
စီမံခန့်ခွဲရေးသည် အုပ်ချု့ပ်ရေး၊ ပညာရေး၊ ကျန်းမာရေး၊ တည်ဆောက်ရေး၊ စီးပွားရေး စသည့် လုပ်ငန်းပေါင်းစုံ တွင် လိုအပ်ပါသည်။ စီမံခန့်ခွဲရေး ပညာရပ် စတင်ပေါ်ပေါက်လာမှု ကို လေ့လာဖော်ပြရန် ခက်ခဲသော်လည်း စက်မှုလုပ်ငန်းစီမံခန့်ခွဲမှုပညာရပ်ကိုမူ ပီတာ ဒရပ်ကာမှ စတင်ခဲ့သည်ဟု သိရှိရပါသည်။
သို့သော်လည်း သမ္မာကျမ်းစာကို ဖတ်ရှုလေ့လာခြင်းဖြင့် ရှေးဦးအကျဆုံး စီမံခန့်ခွဲမှု သဘောတရားကို တွေ့ရှိနိုင်ပါသည်။
အဲဂုတ္တုနိုင်ငံမှ ထွက်ခွာလာသော ဣသရေလ လူမျိုးများ
သမ္မာကျမ်းစာအုပ်သည် သမိုင်းစာအုပ် မဟုတ်ပါ။ သို့သော်လည်း သမိုင်းမှတ်တမ်းများ ပါဝင်ပါသည်။ သမ္မာကျမ်းစာပါ အချက်အလက် အချို့အား ရှေးဟောင်းသုတေသနပညာရှင်များ၏ တူးဖော်တွေ့ရှိချက်များ အရ အတည်ပြုထားသည်များ ရှိသကဲ့သို့ တိုက်ဆိုင်အတည်ပြုရန် လိုအပ်နေသေးသောအရာများလည်း ရှိပါသေးသည်။ ခရစ်ယာန်ဘာသာဝင်များအတွက်မှာ သမ္မာကျမ်းစာတွင် ဖော်ပြထားသော ဘုရားသခင်၏ ကယ်တင်ခြင်းဆိုင်ရာ ကြိုးပမ်းမှုများကို အလေးတယူထား လိုက်နာကြခြင်းဖြစ်ပေသည်။
လွန်ခဲ့သော နှစ်ပေါင်း ၃၅၀၀၊ ၄၀၀၀ ကျော်ကာလက အဲဂုတ္တု နိုင်ငံတွင် ရွှေ့ပြောင်း သွားလာရင်းရောက်ရှိ နေသော ဣသရေလလူမျိုး အမျိုးသမီး နှင့် ကလေးငယ်မျာမပါ အမျိုးသား ဦးရေ ၆-သိန်းကျော်သည် ဖိစီးနှိပ်စက်မှုကို မခံမရပ်နိုင်တော့သဖြင့် ဘုရားသခင် စီစဉ်သည့်အတိုင်း မောရှေ၏ ဦးဆောင်မှုဖြင့် အဲဂုတ္တုပြည်မှ ထွက်ခွာလာကြပါသည်။
ထိုလူအုပ်စုကြီးအား ဘုရားသခင်၏ တာဝန်ပေးမှုဖြင့် မောရှေက ခေါင်းဆောင်လျက် လမ်းပြခေါ်ဆောင်လာ ပါသည်။ ထိုသတင်းကိုကြားရသဖြင့် မောရှေ၏ ယောက္ခမဖြစ်သူ ယေသရောမှ လာရောက်တွေ့ဆုံရင်း ကြုံတွေ့ ရသော အဖြစ်အပျက်မှ သင်ခန်းစာယူ ထားခြင်းဖြစ်ပါသည်။
ထွက်မြောက်ရာကျမ်း အခန်းကြီး ( ၁၈ )
၁၃ - နက်ဖြန်နေ့၌ မောရှေသည် တရားစီရင်ခြင်းငှာထိုင်လေ၏။ နံနက်မှစ၍ ညဦးတိုင်အောင်၊ လူများတို့သည် မောရှေရှေ့မှာနေကြ၏။
၁၄ - မောရှေသည် လူများတို့အားပြုသမျှကို ယောက္ခမ မြင်လျင်၊ ဤလူများတို့အား ပြုသောအမှုသည် အဘယ် သို့နည်း။ သင်သည် တယောက်တည်းထိုင်လျက် လူအပေါင်းတို့သည် နံနက်မှစ၍ ညဦးတိုင်အောင် သင့်ရှေ့ မှာ နေရကြသနည်းဟုဆို၏။
၁၅ - မောရှေကလည်း ဤသူတို့သည် ဘုရားသခင်၏ အယူတော်ကိုခံလို၍ ကျွန်ုပ်ထံသို့လာသောကြောင့် ဤသို့ ဖြစ်၏။
၁၆ - သူတို့သည် အမှုရှိလျင် အကျွန်ုပ်ထံသို့ လာ၍ သူတို့၏အမှုကို ကျွန်ုပ် ဆုံးဖြတ်ရ၏။ ဘုရားသခင်၏ ပညတ်တရားများကို သင်ချရ၏ ဟုယောက္မအား ပြောလျင်၊
၁၇ - ယောက္ခမက သင်ပြုသောအမှုသည် မတော်မသင့်ဖြစ်၏။
၁၈ - သင်မှစ၍ သင်၌ပါသော ဤလူများ တို့သည် အမှန်အားလျော့ကြလိမ့်မည်။ ဤအမှုသည် သင်၌အလွန်လေး၏။ တယောက်တည်း မတတ်နိုင်သော အမှုဖြစ်၏။
၁၉ - ငါ့စကားကို နားထောင်လော့၊ ငါအကြံပေးမည်။ ဘုရားသခင်သည်လည်း သင့်ဘက်၌ ရှိတော်မူလိမ့်မည်။ သင်သည်ဘုရားသခင်နှင့်ဆိုင်သော အမှု၌ လူများတို့၏ အမှုကိုစောင့်လျက် ဘုရားသခင်အထံတော်သို့ ဝင်၍လျှောက်ရမည်။
၂၀ - သူတို့အားလည်း ပညတ်တရားတော်များကို သင်ချရမည်။ သူတို့သွားရာလမ်း၊ ပြုရသောအမှုကိုလည်း ပြရမည်။
၂၁ - ထိုမှတပါး ဘုရားသခင်ကို ကြောက်ရွံ့လျက်၊ သစ္စာနှင် ပြည့်စုံလျက်၊ လောဘကိုရွံရှာလျက်၊ တတ်စွမ်းနိုင်သော သူတို့ကို လူအပေါင်းတို့ အထဲက ရွေးကောက်၍၊ တထောင်အုပ်၊ တရာအုပ်၊ ငါးဆယ်အုပ်၊ တဆယ်အုပ် အရာ၌ ခန့်ထားရမည်။
၂၂ - ထိုသူတို့သည် ခပ်သိမ်းသော အချိန်၌ လူများတို့ကို တရားစီရင်ကြစေ။ ကြီးသောအမှု၌ သင်၏ အယူကို ခံကြစေ။ ငယ်သောအမှုကို အလိုလိုစီရင်ကြစေ။ သို့ဖြစ်လျင် သူတို့သည် ဝိုင်းညီ၍ အမှုထမ်းသဖြင့် သင်သည် သက်သာလိမ့်မည်။
၂၃ - ထိုသို့ဘုရားသခင် အခွင့်နှင့် ပြုလျင် သင်သည်ခိုင်ခန့်လိမ့်မည်။ လူအပေါင်းတို့သည် မိမိနေရာပြည်သို့ ငြိမ်ဝပ်စွာ သွားကြလိမ့်မည်ဟု ပြောဆို၏။
အထက်ဖော်ပြပါ ကျမ်းစာလာအချက်များကို ပိုင်းခြားလေ့လာပါမည်။
၁၃-၁၆ အထိ ဖော်ပြချက်များအရ မောရှေသည် လူအများ၏ အမှုများ ပြဿနာများကို အချိန်ပေးလျက် စေတနာဖြင့် ကြား နာ ဆုံးဖြတ်ပေးလျက်ရှိသည်မှာ အသေအချာဖြစ်ပါသည်။ သို့သော်လည်း အမှုရှိသောသူများ များပြားလှသဖြင့် မောရှေရော လူအများပါ အချိန်ကုန် လူပမ်းစောင့်ဆိုင်းရသည်ကို တွေ့မြင်ရပေသည်။ ဝန် နှင့် အား၊ မြှား နှင့် လေး မမျှလျင် အဆင်မပြေ ဖြစ်ခြင်း၊ အကျိုးထိခိုက်ခြင်းကို ဖော်ပြနေပေသည်။
စေတနာဖြင့် ထမ်းဆောင်လင့်ကစား လုပ်ဆောင်ချက် မှားယွင်းလျင် အပြစ်တင်ခံခြင်းနှင့် မလွတ်ပေ။ တာဝန်ကို မိမိတစ်ဦးတည်း သိမ်းကြုံးထမ်းဆောင်ခြင်း၊ လုပ်ငန်းတာဝန် အငန်းအတာကို သင့်တင့်လျောက်ပတ် စွာ ခွဲစေမပေးတတ်ခြင်းသည် စီမံခန့်ခွဲမှု ညံ့ဖျင်းခြင်းပင်ဖြစ်ပေသည်။ တစ်ယောက်တည်း မတတ်နိုင်သော အလုပ် တာဝန်ကို လူအများ ဝိုင်းဝန်း ပါဝင်လာအောင် ဆောင်ရွက်ခြင်းမှာလည်း စီမံခန့်ခွဲမှု ထိရောက် အောင်မြင်ရေးအတွက် အဓိက အရေးပါသော အချက် ဖြစ်ပေသည်။
၂၀ - သူတို့အားလည်း ပညတ်တရားတော်များကို သင်ချရမည်။ သူတို့သွားရာလမ်း၊ ပြုရသောအမှုကိုလည်း ပြရမည်။
စီမံခန့်ခွဲမှုတွင် အရေးကြီးသည်မှာ လူတိုင်းလူတိုင်း တရားဥပဒေများ၊ စည်းမျဉ်း စည်းကမ်းများ၊ လုပ်ထုံးလုပ်နည်းများကို သက်ဆိုင်ရာ ကဏ္ဍအလိုက် ရှင်းရှင်းလင်းလင်း သိနားလည်ထားကြရန် လိုအပ်ပါသည်။ ဥပဒေအရ တရားဥပဒေကို မသိသဖြင့် ကျူးလွန်မိပါသည် ဟု ဆင်ခြေပေးသော်လည်း အပြစ်မှ ကင်းလွတ်ခွင့် မရှိဟု ပြဌာန်းထားခြင်းမှာ မသမာသူများ ဆင်ခြေ ပေး၍ ရုန်းထွက်မသွားစေရန် သတ်မှတ်ထား သည်မှာ မှန်ကန်သော်လည်း တရား ဥပဒေကို သိထားရန် လူတိုင်းမှာ တာဝန်ရိသည်ဟု မျက်နှာလွဲ ခဲပစ် မကျင့်သုံးသင့်ပါ။ တရားဥပဒေကို လူတိုင်းနားလည်အောင် ပြုလုပ်ရမည့်တာဝန်မှာ စီမံခန့်ခွဲသူများယူရမည့် အရာ ဖြစ်ကြောင်း ညွှန်ပြနေပါသည်။
နောက်တစ်ချက်ကတော့ အသိုင်းအဝိုင်း၊ အဖွဲ့အစည်းတစ်ခုအတွင်းမှာ ပါဝင်နေသော သူများ ပြည်သူများသည် မိမိတို့ သွားမည့်လမ်း မိမိတို့၏ ရည်မှန်းချက် ပန်းတိုင်ကို ရှင်းရှင်းလင်းလင်း တိတိကျကျ သိနားလည်ထားရန် လိုအပ်ခြင်းပင်ဖြစ်ပါသည်။ ရည်မှန်းချက် ကို နှစ်ရှည်၊ နှစ်လတ်၊ နှစ်တို၊ နှစ်စဉ် ရည်မှန်းချက်များအဖြစ်ခွဲခြား သိထားမှသာ မတိမ်းမစောင်း သွားနိုင်ကြမှာ ဖြစ်ပါသည်။ မှားသွားလျင်လည်း မှားမှန်းသိလျက် လမ်းကြောင်း အမှန်ပေါ်သို့ အချိန်မနှောင်းမီ ပြန်လည်တည့်မတ် ပြုပြင် သွားနိုင်မည် ဖြစ်ပါသည်။
သတ်မှတ်စည်းမျဉ်း၊ စည်းကမ်း၊ တရားဥပဒေများ၊ ရည်မှန်းချက် ပန်းတိုင်များကို သေချာသိနားလည်ပြီး နောက်မှာ ပါဝင်သောလူတိုင်းလူတိုင်း လုပ်ဆောင်ရမည့် လုပ်ငန်းတာဝန်၊ အတိုင်းအတာ၊ တိတိကျကျ နားလည် သိရှိထား၇န်လည်း အရေးကြီးပါတယ်။ လူတိုင်းလူတိုင်း မိမိတာဝန် နှင့် မိမိ၊ လုပ်ဆောင်နေဖို့လိုအပ် ပါတယ်။ ကျွန်တော်တို့ငယ်ငယ်က သင်ခဲ့ရတဲ့ အင်္ဂလိပ်ဖတ်စာအုပ်မှာ ခွေးအလုပ် ခွေးလုပ်၊ မြင်းအလုပ် မြင်းလုပ် ဆိုတာ အရေးကြီးပါတယ်။ လှေလှောတဲ့သူကလှော်၊ ပဲ့ကိုင်တဲ့သူကကိုင်၊ လှော်တက်တွေ ညီဘို့ ဗုံတီးတဲ့သူကတီး
သူ့နေရာနဲ့သူ တာဝန်ကျေဘို့အရေးကြီးပါတယ်။ တစ်ခါတစ်ချ ဟွန်းကလွဲရင် အကုန်မြည် တဲ့ မော်တော်ကား ဆိုသလို မိမိရဲ့ပင်မအလုပ်ကလွဲရင် ကျန်တဲ့နေရာတကာပါနေတဲ့ ဌာနတွေ၊ လူတွေ တွေ့နေရတာ အမြင်မတော်သလို ရှုတ်ထွေးမှုတွေကို ဖိတ်ခေါ်သလို ဖြစ်နေတာတွေ တွေ့ရတတ်ပါတယ်။
၂၁ - ထိုမှတပါး ဘုရားသခင်ကို ကြောက်ရွံ့လျက်၊ သစ္စာနှင် ပြည့်စုံလျက်၊ လောဘကိုရွံရှာလျက်၊ တတ်စွမ်းနိုင်သော သူတို့ကို လူအပေါင်းတို့ အထဲက ရွေးကောက်၍၊ တထောင်အုပ်၊ တရာအုပ်၊
ငါးဆယ်အုပ်၊ တဆယ်အုပ် အရာ၌ ခန့်ထားရမည်။
ဒီကျမ်းချက်မှာတော့ လုပ်ပိုင်ခွင့် အာဏာတွေ တာဝန်တွေ ခွဲဝေအပ်နှင်းဖို့ လူရွေးချယ်ရာမှာ လိုက်နာသင့်တာတွေကို ဖော်ပြထားတာတွေ့ရပါမယ်။
- ဘုရားသခင်ကို ကြောက်ရွံ့လျက် ဆိုရာဝယ် ဟီရိ၊ သြတ္တပ္ပတရား မကောင်းမှု လုပ်ရမှာ ရှက်တတ်သူ၊ မကောင်းမှု လုပ်ရမှာ ကြောက်တတ်သူတွေကို ဆိုလိုပါတယ်။ မကောင်းတာလုပ်ရင် မကောင်းတာဖြစ်မယ်၊ ကောင်းတာလုပ် ရင် ကောင်းတာဖြစ်မယ်ဆိုတဲ့ ကံ နှင့် ကံ၏ အကျိုးတရားတွေကို နှစ်နှစ်ကာကာ ယုံကြည်သူတွေ ဖြစ်ရပါမယ်။ လုပ်ချင်တာလုပ် ယတြာကောင်းရင် ပြီးရော ဆိုသူတွေ၊ အကုသိုလ်ကို ကုသိုလ် နဲ့ပေးချေမယ်ဆိုတဲ့သူမျိုးတွေ ရှောင်ရပါမယ်။
- သစ္စာ နှင့် ပြည့်စုံလျက် ဆိုရာမှာ၊ မှန်ကန်မှု၊ တရားမျှတမှုတွေကို လေးစားလိုက်နာသူတွေ ဆိုလိုပါတယ်။ မိမိကို ပေးအပ်ထားတဲ့တာဝန် ဝတ္တရာ လုပ်ပိုင်ခွင့်အာဏာတွေကို မှန်မှန်ကန်ကန် ကျင့်သုံးသူတွေ ကို ဆိုလိုပါတယ်။ ဒီနေရာမှာ တာဝန်ယူခြင်း၊ ပွင့်လင်းမြင်သာရှိခြင်းဆိုတာတွေပါ ပါဝင်ပါတယ်။ မိမိပြောတဲ့အတိုင်း လိုက်နာဆောင်ရွက်ခြင်း၊ အပြောတမျိုး အလုပ်တမျိုးမလုပ်ဘဲ မှန်မှန်ကန်ကန် ဆောင်ရွက်တတ်ခြင်း ဖြစ်ပါတယ်။
- လောဘကို ရွံ့ရှာလျက်ဆိုရာမှာ၊ လူတိုင်းချမ်းသာချင်တာ ကြီးပွားချင်တာ ငွေရှာတာ မမှားပါဘူး။ မှားတာက မရသင့် မရထိုက်တဲ့ စည်းစိမ် ဓန ငွေကြေးတွေကို ၊ မယူထိုတ်တဲ့အရာတွေကို လိုချင်တပ်မက်တာ၊ ခိုးယူတာ ၊ အလွဲသုံးစားလုပ်တာတွေကို ကိုယ်တိုင်လဲ မလုပ်၊ သူတစ်ပါးလုပ်တာလဲ မကြိုက်၊ ခွင့်မပြု ခြင်းကို ဆိုလိုပါတယ်။ မိမိ၏ လုပ်ပိုင်ခွင့်တွေကို အလွဲသုံးစားလုပ်၊ အချင်းချင်း ဆီပေးဆန်ယူ။ နည်းအမျိုးမျိုး နဲ့ မိန်းမ သားသမီး ဆွေမျိုးသားချင်းနာမည်တွေနဲ့ မရသင့်တဲ့၊ မယူသင့်တဲ့ စည်းစိမ်တွေ ရှာထားပြီး ကျွန်တော်တို့ မဟုတ်တာ မလုပ်ပါဘူး၊ မတရားတာ မလုပ်ပါဘူးဆိုတဲ့ လူမျိုးတွေ တာဝန်ပေးမိရင် ငါးပါးသာမက သံဃာစင်ပါမှောက်မယ် ဆိုတာမျိုးကို ဆိုလိုတာပါ။
- နောက်ဆုံးတစ်ခုကတော့ တတ်စွမ်းနိုင်သော သောသူကို ရွေးချယ်တာဝန်ပေးခြင်းဆိုတာ လူမှန် နေရာမှန်ဆိုတာ ရှိပြီးသားပါ။လိုက်နာကျင့်သုံးမှုဘဲ အားနည်းနေတာပါ။ ကရိုနီဆိုတာ စီးပွားရေးလောကမှာသာမက ဝန်ထမ်းလောကမှာလည်း အမျာကြီးပါ၊ အထက်ပိုင်းရာထူးတွေ နေရာမှာ ကျွမ်းကျင် လုပ်သက်ရင့် ဌာနတွင်း ငယ်မွေးခြံပေါက်တွေရာထူးတိုးပေး ခန့်ထားရမည့် အစား အထက်အထက်က ပုဂ္ဂိုလ်များ၏ အိမ်တော်ပါ ငယ်မွေး ခြံပေါက်တွေဘဲ ခုန်ခုန်ချလာတာ ယနေ့ထက်တိုင်လဲ မြင်နေရပါသေးတယ်။
၂၂ - ထိုသူတို့သည် ခပ်သိမ်းသော အချိန်၌ လူများတို့ကို တရားစီရင်ကြစေ။ ကြီးသောအမှု၌ သင်၏ အယူကို ခံကြစေ။ ငယ်သောအမှုကို အလိုလိုစီရင်ကြစေ။ သို့ဖြစ်လျင် သူတို့သည် ဝိုင်းညီ၍ အမှုထမ်းသဖြင့် သင်သည် သက်သာလိမ့်မည်။
စီမံခန့်ခွဲရေးမှာ ကြီးသောအမှုလား၊ ငယ်သောအမှုလား ချင့်ချိန်နိုင်မှုသည် အရေးကြီးပါသည်။ သာမန် အမှုလေးဟုထင်ပြီး သတ်မှတ်ပြီး အောက်ခြေ အဆင့်မှ ဉာဏ်မီသလောက်ရှင်းလိုက်သဖြင့်၊ လျစ်လျူရှုလိုက်သဖြင့် ဒေသအဆင့် ပြဿနာမှ နိုင်ငံတော်အဆင့် ပြဿနာ၊ အပြည်ပြည်ဆိုင်ရာ အဆင့် ပြဿနာဖြစ်သွားတာတွေ၊ တိုင်း နှင် ဒေသကြီး အဆင့်မှာ ဖြစ်နေသော ဖြစ်ရိုးဖြစ်စဉ် ပြဿနာအခက်အခဲ ကို နိုင်ငံတော်အဆင့်မှ အောက်ဆင်းကိုင်တွယ် ဖြေရှင်းနေရခြင်းများသည် စီမံခန့်ခွဲမှု အားနည်းခြင်းကို ဖော်ပြနေပါသည်။
ဝိုင်းညီ၍ အမှုထမ်းရာတွင်လည်း ပြိုင်တူတွန်းလျင် ရွေ့နိုင်သည်မှာ မှန်သော်လည်း လေးဘက်လေးတန်မှ လားရာကို မသိဘဲ သတိမထားဘဲ ဝိုင်းတွန်းနေကြလျင်ဖြင့် သက်ရောက်ရာအားအချင်ချင်း ချေဖျက်ပြီး မရွေ့သည့်အပြင် ချွေးတလုံးလုံးထွက်သည်သာ အဖတ်တင်မှာကိုလည်း သတိပြုသင့်ပါသည်။
၂၃ - ထိုသို့ဘုရားသခင် အခွင့်နှင့် ပြုလျင် သင်သည်ခိုင်ခန့်လိမ့်မည်။ လူအပေါင်းတို့သည် မိမိနေရာပြည်သို့ ငြိမ်ဝပ်စွာ သွားကြလိမ့်မည်ဟု ပြောဆို၏။
စီမံခန့်ခွဲမှု မှန်ကန် တော်တည့်လျင် စစ်အာဏာရှင် စနစ်ဖြင့် အုပ်ချုပ်ရင်း တောင်ကိုရီးယား နိုင်ငံသည် ဖွံ့ဖြိုးပြီး နိုင်ငံအဆင့်သို့ ရောက်သွားပါပြီ။ သယံဇာတ မရှိ၊ သောက်ရေကိုပင် အိမ်နီးချင်း နိုင်ငံမှ ဝယ်သောက် နေရသော၊ သဘာဝ မတူသော လူမျိုးများ ပေါင်းစည်းနေထိုင်သည့် စင်္ကာပူ နိုင်ငံသည် နွားတင်းကုတ် နှင့် သက်ကယ်မိုး ခေါက်ဆွဲဆိုင်များ သာ ရှိသော ဆိပ်ကမ်းမြို့လေးသာသာမှ အပြည်ပြည်ဆိုင်ရာမှ လေးစား အားကျရသည် ဖွံ့ဖြိုးတိုးတက်သော နိုင်ငံ အဖြစ်ရောက်သွားပါပြီ။
တရုတ်ပြည်မကြီးမှ ဘယ်အချိန်လာတိုက်မလဲ ဘာလာလုပ်မလဲ စိုးရိမ်ထိတ်လန့်နေရသော တိုင်ဝမ်ကျွန်းသည် အာရှ၏ အစောဆုံး ကျားဖြစ်သွားပါပြီ။
ကျွန်တော်တို့သည်လည်း မိမိပန်းတိုင် မိမိမြင်လျက်၊ မိမိ အငန်းအတာ မိမိသိလျက်၊ မိမိလမ်းကြောင်း မိမိ မျက်ဝါးထင်ထင် သိမြင်လျက် ဘုရားသခင်ကိုကြေက်ရွံ့လျက်၊ လောဘကိုရွံရှာလျက်၊ မိမိတတ်စွမ်းသလောက် ဝိုင်းညီလျက် တွန်းကြလျင်ဖြင့် ရည်မှန်းချက်ပန်းတိုင်သို့ ဖြောင့်ဖြောင့်တန်းတန်း ရောက်ရှိနိုင်ကြမည် ဖြစ်ပါသည်။
Monday, May 12, 2014
Biblical Delegation of Power
Subscribe to:
Post Comments (Atom)
No comments:
Post a Comment